நீ என் காதலி அல்ல
என் முட்டாள் தனங்களை புரிய வைத்தவள்.

உனது வெறுப்பு
கோப விதைகளை கொண்டு தான்
நான் எனக்கான தைரியம் அதிகமும்
கொஞ்சம் வெற்றியும் விளைவித்து கொண்டேன்.
அதில் களைகளாய் கெட்ட பழக்கங்களும்.
 
உன்னால் தான்
பெண் தோழமையின் அத்து மீறலின் அழகும்
ஆண் தோழமையின் வரம்பும்
எனக்கு கை வந்தது.

முதல் உண்மை  காதல் தோற்பது நல்லது
அதில் நீங்கள் உங்களை படிக்கலாம்
உலகம் படிக்கலாம்

நீ என் காதலி அல்ல
என் குரு.

பள்ளியிலும் சரி கல்லூரியிலும் சரி
எதேனும் ஒரு நண்பன்
கூட படித்த அனைவரின் தகவல்களும்
தெரிந்து வைத்து இருக்கிறான்
எத்தனை வருடம் பின்னரும்

காசுதான் கொடுத்து
சாப்பிடுகிறோம் என்றாலும்
ஏதேனும் ஒரு நொடியில்
உணவின் மீது
மின்னி மறையும் காதல்?
சாப்பிட்டு முடிந்ததும்
"திருப்தியா" என கேட்கும்
கண்களின் குருஞ்சிரிப்பும்
சக்கரைபொங்கல் இடையே
தட்டுப்படும்
முந்திரி போல

தம்பிக்கோ அண்ணனுக்கோ
தன் சகோதரிகளிடம்
வயதிலும் மனதிலும் பெரிதாய் ஆன பின்
பாசம் காட்ட நேரிடும் தருணங்கள்
மழை கால மதிய நேரத்தின்
பனித்துளி போன்றது

அம்மா வெளியே சென்று இருக்கும் நேரங்களில்
வீட்டின் மீதான
அப்பாவின் கவனித்து கொள்ளும் நேரங்கள்
கோடை கால மழை போன்றது

யாரேனும் மல்லிகை வைத்து
அருகே நிற்கையில்
உனது கழுத்தின் தீயிலும்
என் கைகளின் தீயிலும்
எரிய ஆரம்பித்து
நம் கத கதப்பில் கருகி முடிந்து
பழுப்பாய் கிடந்த மல்லிகையின்
வாசத்தோடே உனக்கே உனக்கான
உன் வாசமும் நிகழ்ந்த
அறையின் வாசம்

எட்டாம் வகுப்பு கணக்கு சார்
வராத பாட வேளை அறை
நேரம் போல வருவது இல்லை
எட்டி சுகம் பறித்து மயக்கங்கள் பருகும்
அறையின் கண் கிடக்கும் நேரங்கள்