காமமும்
காட்டு மிருகம்
போல் தான்

வேட்டையாடிய/
பசியாறிய பின்
அமைதலாய்
துயில்வதுண்டு

திரும்பி பார்க்கையில்
எல்லாமே அழகு

பெண்கள்
காயங்கள்
காதல்
வலி
வகுப்புகள்

குளித்தது என்னவோ
அவள் தான்
ஆனால்
ஈரங்கள் என்னில்

my quick pencil drawing

மழைக்காலம்

மழைக்கால
இளங்காலையில்
தலைக்கு
குளித்து எதிர்ப்படும் பெண்
குதித்து நடக்கும் குற்றாலம்
இடம் பெயரும் இமயமலை
கூந்தல் வாசமோ
மழை பெய்த
அசோகவனம்.

மழைக்கால
இளங்காலையில்
பள்ளி சிற்றூர்தியின்
முன் இருக்கையில்
அமர்ந்து தூங்கும்
சீருடைச் சிறுமியின்
தூக்கம்
ஒரு அழகிய ஓவியம்
போன்றதொரு  தியானம். 

எனக்கு இன்றைய அரசியல்
ஆர்வமில்லை
என்றாலும்
சிறு வயதில்
அப்பாவின் கட்சிக்காக
சுவர் விளம்பரங்கள்
வரைந்து
சுவர் ஒட்டிகள்
ஒட்டியதுண்டு.
காங்கிரஸ்
தோற்றபோது
சின்னதாய்
வருந்தியதுண்டு.

முகங்கள்

சில முகங்கள் பார்த்தது
சில நாட்களே என்றாலும்
எவ்வளவு வருடம் பின்னரும்
அதன் சாயல் மனதில் படிந்து விடும்
சிம்னி விளக்கின் புகை போல

கல்லூரி வாழ்க்கையில்
ஹிந்தி சினிமா புரிவதற்க்காகவே 
சில நாட்கள் சென்ற
திருநெல்வேலி தெற்கு பஜார்
காலை ஆறு மணி  ஹிந்தி வகுப்பின்
கூட படித்த ஒரே பெண்
ஒரு நாள் பேனா (कलम) ( :-)) தந்த
அந்த பெண்
ஒரு நாள் காலையிலே கண்கள் கலங்க இருந்த
அவளின்  முகமும்
அதில் ஒன்று